Ortigueira estará en Lorient

Quedan soamente dúas semanas para que na Bretaña francesa comece o xa mítico Festival Intercéltico de Lorient. E hai que recordar que o Festival Internacional do Mundo Celta de Ortigueira está moi ligado a Lorient. Aló pola década dos 70, nunha das primeiras edicións do tan afamado festival, gaiteiros de Escola de Gaitas de Ortigueira chegaron a Lorient. Así, logo de veren a calidade de tal evento, o Festival de Ortigueira sería nado desa visita. Por iso, podemos dicir que o Lorient é a cuna do Festival de Ortigueira.

E este ano estaremos moi ben representados no Intercéltico. A Escola de Gaitas de Ortigueira é unha das bandas galegas que formará parte do cartel. Un cartel repleto de agrupacións chegadas dende os paises celtas. Fred Morrison, Gwendal, Jacky Molard, La Bottine e Skolvan. Estes son nomes que para o Festival de Ortigueira xa son coñecidos e que este ano forman parte da programación de Lorient.

Pero Galicia en xeral estará moi ben representada nesta 40 edición do festival. Folk Branhas, Cantigas da Terra, Coanhadeira e Milladoiro serán as bandas que, xunto coa Escola de Gaitas de Ortigueira, fagan soar a música galega na Bretaña francesa.

Advertisements

O xurado falla a favor do grupo vigués The Crass

O Proxecto Runas xa ten gañador. Os vigueses The Crass foron o grupo que levou maior puntuación dun xurado con representantes da Escola de Gaitas de Ortigueira, técnicos de producción e son do Festival e xornalistas.

The Crass é unha banda que mestura músicas. Dende o folk máis galego, pasando polo jazz ou pola música irlandesa, son algúns dos estilos que compoñen o son do gañador da décima edición do Proxecto Runas.

O ano que ven o Festival Internacional do Mundo Celta de Ortigueira contará coa súa presenza no escenario de Estrella Galicia.

The Crass en Youtube

A tarde de hoxe…

O ano 2000 foi o ano no que o Proxecto Runas deu comezo. Este ano a presentación das bandas tivo lugar no escenario Estrella Galicia. Hoxe, dende as 17.00 horas, Celtic Maze, Xabi Abuzurraga e The Crass facían soar os seus instrumentos con dous propósitos: facer disfrutar ao público presente e ser o gañador desta décima edición do concurso. Mañá o xurado, que estivo presente en todos os concertos, fallarán a favor dun dos tres grupos.

Cabe destacar tamén que hai apenas un cuarto de hora, a película Crebinsky comezou a proxectarse por última vez no Teatro da Beneficencia de Ortigueira. Así, os actores e a mesma banda Crebinsky collen as súas maletas e marchan cara outros pobos galegos a presentar a tan esperada filme.

E o tradicional desfile de bandas

Este mediodía Ortigueira si que era arte. O tradicional desfile de bandas fixo que todas as rúas da vila estiveran ambientadas ao son de gaitas e percusións. Unha decena de agrupacións fixeron entolecer aos presentes na súa chegada ao Cantón gracias á boa música e á gran posta en escena de bandas como a de Celturia (Valencia) e Mazikandú (Murcia).

Ás 14.30 horas facía entrada na rúa máis céntrica da vila ortegana a Escola de Gaitas de Ortigueira. A anfitriona daba comezo así a un espectáculo que duraría arredor dunha hora e media. Unha hora e media ambientada por unha música coa que público quedou abraiado. Cabe ter en conta o bo ánimo e a entrega de todos os músicos que, logo de recorreren a vila, chegaron ao Cantón cheos de forza e desexosos de entreter a un público rendido á súa música.

Moi boa música na última noite do Festival

Moi puntuales, ás 20.00 horas de onte a Bagad Karreg An Tan comezaba a súa actuación no Festival de Ortigueira. Con moito ritmo e enerxía, a banda bretona fixo disfrutar ao público durante un pouco máis de media hora. Sen ningunha dúbida, un moi bo comezo da noite.

A Bagad deixaba o escenario para dar paso ao grupo local, Chirlo Mirlo. Cun repertorio de pezas moi coñecidas, os ortegáns fixeron disfrutar aos alí presentes. Pero a música galega seguiría a ter protagonismo durante varias horas. Leilía e Anxo Lorenzo Band serían os encargados diso. Leilía abría a actuación na súa liña máis tradicional. Pero conforme ían transcorrendo os minutos, as cantareiras comezaron a mostrar, coa axuda da súa banda, uns temas con aires innovadores. As cantareiras deixaban o escenario Estrella Galicia e daba comezo a que para moitos foi a actuación da noite. A Anxo Lorenzo Band mostrou un directo envexable. Cunha banda de músicos sobresalientes, Anxo Lorenzo amosou a Ortigueira un dominio total da música folk. Baixo unha execución perfecta de whistles, gaita, violíns e demais instrumentos, esta banda fixo bailar e brincar aos festivaleiros.

E era o turno da banda americana Gaelic Storm. Un concerto moi animado fixo, ao igual que a Anxo Lorenzo Band, vibrar ao público. E na mesma liña, Shooglenifty, arrancou en Ortigueira máis que aplausos. Un público moi entregado foi o agasallo que a banda escocesa se levou de Ortigueira.

Pero a noite de festa chegaba ao seu fin. Os encargados de pechar a noite foron Rare Folk. O grupo andaluz, que xa visitou Ortigueira en moitas ocasións, serviron un concerto cheo de enerxía que, sen dúbida, fixo que o público se despedira da vila ortegán cun gran sabor de boca.

Última noite de Festival

Deu comezo unha nova xornada musical en Ortigueira. Abría os concertos do escenario Estrella Galicia a Bagad Karreg An Tan. Nestes mesmo momento o grupo ortegán Chirlo Mirlo fai bailar aos festivaleiros. E queda unha noite de moi boa música por diante. Leilía, Anxo Lorenzo Band, Gaelic Storm, Shooglenifty e Rare Folk serán os grupos que pisarán o escenario do Festival de Ortigueira.

As cantareiras de Leilía pasarán hoxe por Ortigueira, feito que non ocorre dende o ano 2006. É un grupo que xa conta con tres traballos discográficos e un recopilatorio no que conta coa colaboración de músicos como Xosé Manuel Budiño ou Milladoiro. Para elas estar no cartel do Festival do Mundo Celta de Ortigueira é “un honor e unha presión, pero do mesmo xeito que un disfrute total”. Ao demais Leilía asegura que hoxe “os festivaleiros poderán ver e escoitar a Leilía de sempre, máis tradicional que é que comezamos o concerto. Despois un cambio radical que será un adianto do novo traballo”.

Por outra banda, cabe mencionar a actuación dos irmáns Molard, mestres bretóns que xa fai algúns anos actuaran no Festival. Así, durante máis dunha hora, a praza de Isabel II bailou ao son dos xa míticos “Molard Brothers”.

Útima noite de música do Festival de Ortigueira si,  pero mañá chegará o Proxecto Runas a partires das 17.00 horas no mesmo escenario Estrella Galicia. As bandas Celtic Maze, Xavi Aburruzaga e The Crass serán as que participen neste concurso.

A noite do venres…

“Me he calmado un poco, pero la energía fluye cada día más”. Estas foron algunhas das palabras que Cristina Pato pronunciou diante da cámara de “La voz móvil”. A gaiteira galega non estaba a mentir. Un concerto ben diferente ao que nos tiña acostumados. Unhas composicións cun certo aire contemporáneo. Bos músicos e bo son, pero un programa demasiado tranquilo para os alí presentes. Ainda así, Cristina Pato soubo pór nalgúns intres o punto musical que fai uns anos a caracterizaba: unhas pezas moi enérxicas e galegas que, tanto ela como a súa banda, disfrutaban baixo o delirio dos alí presentes. Ademais, Rosa Cedrón, ex-vocalista de Luar na Lubre, tivo presenza no escenario, ambientando a Alameda ortegana coa súa xa recoñecible voz.

Cristina Pato marchaba, pero Afterhours e os cataláns Qui hi ha? serían os encargados de pór música ás últimas horas da xornada de festa. Un son plenamente celta foi o que Afterhours amosou en Ortigueira. Pola súa banda, o banda Qui hi ha? pechou a noite cunha actuación moi enérxica.

A Escola de Gaitas na súa liña: inigualables.

Marful deu o que prometeu horas antes. O grupo galego fixo que o público vibrase coa súa música, do mesmo xeito que as letras si conseguiron chegar aos alí presentes. Aínda pegaba o sol, pero na Alameda ortegana estábase a comezar o que se prevé unha gran noite de música.

Pero deixaba o escenario Marful e era o turno da Escola de Gaitas de Ortigueira . Hai menos dunha hora o público entregábase ante a maxestuosidade da banda ortegana. A xa mítica “Polca para Pucho”, adicada ao seu compositor, alí presente, Ernesto Campos, e a “Muiñeira do Albariño” foron algunhas das pezas que a Escola de Gaitas, baixo a dirección de Rodrigo López, executaron rozando a perfección. Para rematar, o Himno Galego e un inesperado bis, “Na beira” e “Quen teña viño”. Cabe destacar a participación do corpo de baile da agrupación e a colaboración das tres cantareiras da Central Folque de Santiago.

Nestes intres, Ortigueira baila ao son de Orion.

Nova noite de boa música

Ortigueira está a poucos minutos de que comecen a soar os primeiros acordes de Marful. Este grupo galego autodefínese como unha banda de ultramar que conta cun estilo de música popular urbana, con inspiración das músicas dos cafés cantantes, das primeiras orquestras de jazz e de diferentes xéneros da música folk.

Ugía Pedreira, a súa vocalista, falounos do seu próximo traballo: ” trátase dun disco no que o subrrealismo estará moi presente,do mesmo xeito que a plasmación das nosas vivencias e reminiscencencias ao Brasil e Cuba”. Do mesmo xeito, tamén nos falou da súa presenza no cartel do Festival como que é un acto “xusto é necesario, xa que, no meu caso, tócame tocar na comarca onde eu nacín”. Respecto ao directo de Marful, a súa vocalista quixo apuntar que “nós non demostramos nada, simplemente mostramos a música que facemos estas catro individualidades, xa que cada unha delas temos un curriculum diferente e ecléptico, pero que os catro xuntos crean un son marfuliano. E Marful vai facer música de baile e intentar que a xente mova os pés o o corazón”.

Festivaleiros, unha nova noite de boa música está a piques de dar comezo. Logo de Marful, tomará escenario a Escola de Gaitas de Ortigueira, seguida de Orion, Cristina Pato, Afterhours e Qui hi ha?.

Algunhas novas…

Non podía faltar. Xosé Manuel Budiño volve un ano máis a Ortigueira. Non será no escenario Estrella Galicia, pero o gaiterio galego formará parte da programación do Festival. Mañá ás 19.30 horas, no stand oficial situado na Alameda, Budiño asinará exemplares do seu novo traballo, “Volta”. Un traballo que se basea no recopilatorio das viaxes feitas polo músico no último ano e no que Ortigueira ten gran protagonismo, xa que inclúe o seu concerto da pasada edición do Festival do Mundo Celta.

Outra das novidades é que a organización do Festival proxectará a final do Mundial de Fútbol entre España e Holanda. A cita será o domingo ás 20.30 horas. Para iso se habilitará na Alameda unha pantalla coa que ortegáns e visitantes poderán disfrutar do partido da selección.