Ortigueira xa é a capital da música celta

E parece que non eran argalladas miñas nin imaxinacións que puideran xurdir do meu “frikismo” confesable por este festival as que fixeran que este mediodía vise festivaleiros onde non os había. Está comprobado que é inconfundible saber cando unha persoa vai para o Festival Ortigueira e cando non…

A Liña 5 do servizo de transporte urbano de Santiago que, para os que non o coñezades, é a que enlaza o centro da cidade coa Estación de Autobuses, ás 13.45 horas deste mediodía ía recollendo en difrentes paradas a rapaces e rapazas con tenda de campaña en man e mochilas de bos viaxeiros ao lombo. Ademais, roupa cómoda e, como non, cartón de viño á vista. Si, poderían ir para calquera outro festival ou mesmo para unha simple acampada de amigos. Pero estaba claro que non, e non me equivoquei. Mirei os horarios das liñas especiais para o Mundo Celta e, efectivamente, non me equivocaba. Ás 14:30 horas tiña saída o segundo autobús do día para o festival e, obviamente, hai que ir con tempo para non quedar en terra e ter que esperar ás 19.00 horas a que saia outro… O tempo en Ortigueira é ouro, e canto antes se estea alí, mellor. Que envexa me deron…

 

20130711-223732.jpg
O primeiro concerto do Festival 2013
(D. Pérez)

Agora, de seguro, algún deles estará xa na acampada de Mourozos ou na Alameda escoitando aos Runas como están todos eses festivaleiros nesa foto que me acaban de enviar dende Ortigueira…

E é que xa está aquí, agora si que si o poido dicir aínda que sexa dende Compostela…

Arranca a XXIX edición do Festival Internacional do Mundo Celta de Ortigueira.

Lume Ortigueira!!!!!! Vémonos mañá!!

Advertisements

Lembranzas

Tempo de recordar a memorable actuación do acordeonista Kepa Junkera no ano 2007 en Ortigueira. O seu xa mítico “Bok Espok” facía brincar aos milleiros de folkies que enchían a Alameda da vila. Ese mesmo ano compartía cartel cos desaparecidos anglo-irlandeses Flook, un grupo encabezado polo frautista Brian Finnegan, que é agora recoñecido por todos nós por participar este mesmo ano en Ortigueira da man da Brian Finnegan Big Band. Foi curioso que na actuación deste ano Finnegan quixo que os festivaleiros volvesen, dalgún xeito, a esa edición do 2007; e é que, acompañado pola súa banda, o frautista tocou ese tema que hai catro anos fixera vibrar a Ortigueira: o “Bok Espok” de Kepa Junkera.

Non foi esa a única vez que o bilbaíno estivo en Ortigueira. No ano 2002 Kepa Junkera chegaba ao noso Festival para actuar nun escenario no que tamén estarían os galegos Berrogüetto e Carlos Núñez, ademais do maxestuoso Liam O’Flynn e os Gaiteiros de Lisboa (entre outros). Gran programación a desa edición e un  Proxecto Runas no que outros andaluces (coma este ano) se facían co galardón. Os xa soados en Ortigueira Rarefolk lograban convencer ao xurado dese ano e, dalgún xeito, convencer á organización, xa que a pasada edición volvían a Ortigueira para pechar a derradeira noite de música na vila.

Pero a primeira vez que Kepa Junkera chegaba a Ortigueira foi no 1996, soamente un ano despois de que o Festival Internacional do Mundo Celta volvese a pórse en marcha. Nesa XII edición tamén debutarían os escoceses Shooglenifty, que volverían a Ortigueira no ano 2003 e 2010, e o mestre solista irlandés Mick O’Brien, que estaría tamén no 1997.

A Kepa Junkera coa súa visita no ano 2002 a Ortigueira “non lle quedou máis remedio que compoñerlle e adicarlle un tema” á nosa vila. Dese xeito, no ano 2003 no seu álbume “K” poderíase escoitar “Ortigueira Dantza”.

Canto teremos que esperar para bailar ao son de “Bok Espok” ou “Ortigueira Dantza”? Esperemos que non moito.

Todo listo para a derradeira noite de festa

Bruno AreaA Praza de Isabel II baila ao son da “Rumba para Susi”, e é que a Banda de Gaitas de Robaleira de Cedeira está a ofrecer un concerto na céntrica praza. Os que se acheguen ata alí poderán disfrutar de gaitas e tambores, acompañados de acordeón e, de vez en cando, ata un teclado. Un bo son para pasar esta soleada tarde en Ortigueira e para abrir boca do que será esta noite a derradeira xornada de festa no Estrella Galicia.

Mentres as bandas de gaitas lle puñan a banda sonora ás rúas da vila, o escenarioBruno Area principal estaba en plenas probas de son. Comezaban a primeira hora da tarde os galegos The Crass, seguidos de Searson e The Elders. E neste mesmo momento son os galegos Luar na Lubre os que están no escenario poñendo todo a punto para que, en poucas horas, arranque o que será unha gran noite en Ortigueira.

Bruno AreaEstá todo preparado, as rúas están ateigadas de xente e a acampada de Morouzos outro tanto. A entrada en Ortigueira en coche comeza a ser un pouco lenta pero non vos preocupedes, a espera asegúrovos que valerá a pena.

Vinde á derradeira noite do Festival do Mundo Celta de Ortigueira.

Fotos: Bruno Area

Esperando por Ulträqäns

María QuintianaHai apenas media hora que rematou o acto inaugural do Festival. A Escola de Gaitas de Ortigueira, en papel de anfitriona, foi a encargada de abrir e pechar o acto que duraría unha aproximadamente unha hora. Logo de facer resoar a Praza de Isabel II, as tres bandas dirixíronse ao recinto da Alameda, quedando así inauguradas as xornadas de música en Ortigueira. Ao paso das gaitas, mimos en malabaristas apropiábanse, un ano máis, das rúas principais para ledicia de pequenos e maiores.

Agora mesmo terían que estar a soar Ulträqäns pero, como adoita ser habitual, a media horiña de retraso non lla quita ninguén. Sen máis, e esperando que comece a música no escenario Estrella Galicia, seguimos esperando por vós en Ortigueira.

Recordade que mañá Berrogüeto presentará o seu novo álbum, “Kosmogonías” e o sábado será a quenda de Luar na Lubre, que fará disfrutar aos folkies ao son de “Solsticio”.

E o tradicional desfile de bandas

Este mediodía Ortigueira si que era arte. O tradicional desfile de bandas fixo que todas as rúas da vila estiveran ambientadas ao son de gaitas e percusións. Unha decena de agrupacións fixeron entolecer aos presentes na súa chegada ao Cantón gracias á boa música e á gran posta en escena de bandas como a de Celturia (Valencia) e Mazikandú (Murcia).

Ás 14.30 horas facía entrada na rúa máis céntrica da vila ortegana a Escola de Gaitas de Ortigueira. A anfitriona daba comezo así a un espectáculo que duraría arredor dunha hora e media. Unha hora e media ambientada por unha música coa que público quedou abraiado. Cabe ter en conta o bo ánimo e a entrega de todos os músicos que, logo de recorreren a vila, chegaron ao Cantón cheos de forza e desexosos de entreter a un público rendido á súa música.

Ortigueira está xa posta en marcha

E por fin milleiros de persoas disfrutaron ao son da música de Ortigueira. Krêposuk daba comezo ao fervor musical do recinto da Alameda. “Esto si que es música del Festival” é o que dicía unha veciña da vila cando o grupo bretón levaba case xa unha hora facendo vibrar aos asistentes. E é que deron o que prometeron. Moita enerxía e boa música. Un estilo rock pero marcado fortemente polas raíces celtas. Krêposuk soaba a Festival.

Pero pasadas as doce da noite, o público agardaba á única banda española da noite do xoves. Celtas Cortos, que foron, sen dúbida, a maior sorpresa do cartel de este ano, entregáronse a Ortigueira. Do mesmo xeito, a colaboración da banda coa gaiteira Susana Seivane foi un dos momentos máis alxidos da actuación.

E a noite remataba, pero con boa compaña. A mítica banda inglesa Oysterband soubo, unha vez máis, mezclar á perfección o estilo rock con chamadas a música á que o público de Ortigueira está acostumado a disfrutar: a música celta. Para iso, Susana Seivane voltaba ao escenario da man dunha Oysterband máis galega que nunca.

Pero hoxe a noite será moito máis longa. Marful abrirá o escenario Estrella Galicia para dar paso á Escola de Gaitas de Ortigueira. Orion, Cristina Pato, Afterhours e Qui hi ha?, gañadores do Proxecto Runas do pasado ano, serán logo os encargados de pór a banda sonora da noite do venres do Festival.

Unha longa tarde…

Ás 15.30 horas desta tarde si que comezaba o Festival de Ortigueira. Primeiras probas de son. Krêposuk, Celtas Cortos e Oysterband. E unha sorpresa, Celtas Cortos contarán coa colaboración de Susana Seivane.

Agora si que si. Estamos a menos dunha hora de que comecen a soar os primeiros acordes no escenario Estrella Galicia. Krêposuk serán os encargados de abrir o cartel de este ano. Moita enerxía é o que esta banda promete transmitir na súa actuación.

Pero hai escasa media hora, a Escola de Gaitas de Ortigueira foi a encargada, un ano máis, de abrir o acto inaugural desta nova edición. Para iso, a praza de Isabel II bailaba ao son da xa mítica peza “Lume das catro e media”.

Logo da banda ortegana, a Banda de Gaitas Viana-Manzaneda, a Jonhstone Pipe Band, o dúo de zanfoña e voz de Óscar Fernández e Cristina Pico, respectivamente, e un cuarteto de gaitas escocesas, foron os que seguiron o espectáculo na praza principal da vila de Ortigueira.

E todo isto, precedido polo estreo do “Universo Crebinsky”. A Banda Crebinsky percorreu as rúas máis céntricas de Ortigueira, partindo do mítico bar “Caracas”, lugar polo que todo bo músico que pasa polo festival non deixa de visitar, ata facer entrada na praza do Concello. Alí os esperaban os irmáns protagonistas xunto coa súa inseparable vaca Muchka.

E nada máis amigos, Ortigueira está agardando por vós.