Participa no Proxecto Runas 2016 e na Feira de Artesanía

Nótase que xa estamos a tres meses de que dea comezo a XXXII edición do Festival de Ortigueira porque comezan a abrirse os prazos tanto para presentar as candidaturas ao Proxecto Runas coma para solicitar os postos na Feira de Artesanía. De feito, estamos xusto a tres meses, porque o tamén xoves 14 de xullo dará comezo un novo Mundo Celta do que, ata o de agora, non sabemos moito.

Pero o que si sabemos é que os galegos Milladoiro serán os encargados de pechar a edición e o espectáculo Keltia, da compañía galega Queiman e Pousa, os que abrirán a primeira noite de festa no escenario principal. Confirmados tamén están, como non, o grupo gañador da edición pasada do Runas, as irlandesas Perfect Friction, e a banda inglesa Peatbog Faeries.

Proxecto Runas 2016

Queres partipar coa túa banda no concurso para artistas e grupos noveis do Festival de Ortigueira? O prazo está aberto dende o día 8 de abril ata o 27 de abril. A partir do venres 6 de maio poderanse escoitar os traballos na páxina web do Festival de Ortigueira e nese mesmo momento activarase tamén o proceso de votación online, que finalizará o venres 20 de maio ás 18 horas.

Unha vez finalizado o proceso, os grupos finalistas decidiranse por un sistema de 5 votos. Un virá da votación online e os outros catro dun xurado formado por músicos, xornalistas musicais e promotores seleccionados pola organización. O día 25 de maio a páxina web do Festival de Ortigueira anunciará as tres bandas finalistas do Proxecto Runas 2016, que actuarán no escenario principal na noite do xoves 14 de xullo.

Podes descargar aquí as bases do Proxecto Runas: Festival Ortigueira Proxecto Runas 2016

Feira de Artesanía

Pero se eres artesán ou vendedor ambulante tamén tes a oportunidade de partipar no Festival de Ortigueira. Por iso, dende onte e ata o próximo 9 de maio poderanse presentar as solicitudes para formar parte da Feira de Artesanía do Mundo Celta. Estas solicitudes poderanse facer en tres modalidades diferentes: artesáns, artesanías do mundo e venta ambulante.

Se estás interesado consulta as bases da Feira de Artesanía na seguinte ligazón: Festival Ortigueira Feira Artesanía 2016

Xa non queda nada! 😉

@María Quintiana

 

Para cando un Festival de Ortigueira 3.0?

Aviso para navegantes! Este vai ser un artigo moi persoal, e o será porque volveu pasar o de sempre cando a verdade é que me esperaba un cambio. O XXXII Festival Internacional do Mundo Celta de Ortigueira presentouse un ano máis en FITUR. Para quen non o saiba, esta Feira Internacional de Turismo foi considerada a segunda máis importante do mundo e este ano contou cun 8% máis de participación empresarial que en 2015.

Primeiro de todo, felicitar a Rei Zentolo polo deseño do cartel da nova edición do Mundo Celta. Ten protagonismo a música e eses instrumentos que podemos ver e escoitar durante os días de festa na vila. Tamén me gusta que o Festival de Ortigueira vaia ter continuidade durante todo o ano e que se aposte por novos proxectos como a candidatura presentada ao programa Creative Europe Culture. E, como non, non pode non gustarme a volta de Milladoiro ao Festival e a outra banda que anunciaron, os ingleses Peatbog Faeries. Pero destes últimos xa falarei noutro artigo para que os coñezades un pouco mellor.

O que non me gusta é que non se aproveite unha ocasión como esta para presentar como se merece o Festival de Ortigueira. Estamos case no mes de febreiro e os grandes festivais de música, como poden ser o BBK Live de Bilbao ou o Resurrection Fest de Viveiro, xa teñen confirmados case todos os grupos. Que, por certo, o primeiro conta con máis de 115.000 seguidores en Facebook, e o segundo ronda os 93.000. O noso só supera os 11.000 (en Twitter e Instagram os datos son semellantes). O Festival Internacional do Mundo Celta de Ortigueira, ademais de ser o impulso económico e socio-cultural da comarca do Ortegal, tense convertido nun dos festivais de música celta e folk de referencia a nivel mundial. Ao igual que tamén se converteron o BBK Live e o Resurrection Fest dentro dos estilos musicais nos que se moven. Por iso, creo que queda un camiño moi grande por percorrer dentro do Festival de Ortigueira. Este ten que entrar dunha vez por todas no século XXI, no mundo 3.0, unha nova época que nos brinda a posibilidade de chegar ao noso público obxectivo e potencial máis rápido e dunha maneira máis eficaz. Porque o que queremos, ou o que deberiamos querer, é que o noso Festival medre, que o noso Festival sexa o mellor. Que cada vez cheguen á vila máis persoas, que cada vez sexan máis os medios de comunicación que se fagan eco das nosas novas. Pero, sobre todo, que cada vez destaquemos máis pola nosa calidade á hora de organizar e manexar un evento tan importante coma é o Festival de Ortigueira.

Por iso, eu soamente espero que nalgún momento nos deamos de conta da  necesidade de estar á par dos festivais de música de referencia do noso país. E iso soamente se conseguirá con traballo, con novas ideas e coa concienciación de que as canles de comunicación cambiaron. E por iso temos que estar presentes, da mellor das meneiras, en todas elas. Ademais, temos que chegar a eventos coma FITUR con todo, ou case todo, listo. E isto pódese facer: soamente hai querer. Porque, querer é poder, non? Pois eu, coma moitos, quero. 

 

Este venres farei un dos meus soños realidade grazas á Escola de Gaitas de Ortigueira

Aínda non o creo, por moito que xa teña todo case preparado. O certo é que tampouco había moito que preparar. E o digo porque para min falar da Escola de Gaitas de Ortigueira é moi sinxelo: soamente teño que expresar todas as emocións que a Escola e o Festival me teñen feito sentir dende que tiña 3 anos.

E é que, amigas e amigos, non sabedes o pracer que é para min contarvos que o vindeiro
venres ás 22.30 horas farei realidade un de cantos soños andan pola miña cabeciña: volverei subir ao escenario de Festival Internacional do Mundo Celta de Ortigueira, pero esta vez para presentar á Escola de Gaitas de Ortigueira. Que orgullo tan grande, e máis tendo en conta que se trata dunha data tan sinalada, porque a Escola está de 40 aniversario e o Festival cumpre 20 anos dende que comezara a súa segunda etapa, 8 anos despois sen se ter celebrado.

Letras Galegas 1995. Con 4 aniños, primeira actuación en público coa Escola de Gaitas de Ortigueira.

Budiño, protagonista do Mundo Celta vinte anos despois da súa primeira actuación en Ortigueira

Non podía ser doutra maneira. 20 anos despois da súa primeira actuación no Festival de Ortigueira, Xosé Manuel Budiño volve reconvertido no director artístico da noite do sábado. 20 anos, como pasa o tempo.

Era o ano 1995 e logo de oito anos sen se poder desfrutar do Festival de Ortigueira, o Mundo Celta volve sair adiante, esta vez no mes de agosto porque había eleccións e non daba tempo de pechar presupostos. Nesa primeira edición da nova etapa estaba Xosé Manuel Budiño, que chegaba a Ortigueira co seu grupo Fol de Niu da man de Raúl Piñeiro (D.E.P.).

Primeiro, uns recordos…

Para min falar de Budiño é falar de Raúl Piñeiro. Non esquecerei nunca, por mais que fora unha rapaciña de pouco máis de 4 anos, o que lle dixo Raúl a Budiño cando chegou ese mesmo ano á miña casa: “aquí nesta casa non se entra se non se toca unha peza con María no tambor”. Saín correndo a toda veolocidade polas baquetas e alí, na mesma cadeira da cociña onde adoitaba estar sentado o meu avó Bernardo (D.E.P.), tocamos a Muiñeira de Chantada, Fonsagrada e algunha ca outra máis. Moitos dos que me estades a ler non saberedes quen é Raúl Piñeiro, algo que me doe moito porque foi unha persoa que se desviviu para sacar adiante o Festival de Ortigueira dende 1995 e durante 4 anos, xunto con outras persoas. Pero creo que sei quen vos pode ensinar moi ben a labor que fixo no Mundo Celta. Neste sentido, este venres haberá un post no que coñeceredes a Raúl, esa persoa que quixo tanto a Ortigueira e ao noso Festival. 

Budiño no Festival 2015

Jacky Molard Quartet, Oreka Tx + Kalakan, Budiño e Finnegan-McSherry Project. Ese é o cartel que Xosé Manuel Budiño preparou como director artístico da noite do sábado; e os míticos Capercaillie para a noite do domingo. O violinista dos tres irmáns Molard, toda unha referencia no mundo do folk e do celta. Oreka Tx + Kalakan traeránnos os ritmos e os sons máis característicos de Euskadi: os da txalaparta. Brian Finnegan de seguro pisará o escenario de Ortigueira cun espectáculo de música irlandesa no que quedaremos abraiados coa súa técnica á hora de tocar os whistles. E de Budiño aposto por un concerto no que repasará a súa discorgrafía e fará vibrar ao público de Ortigueira cos seus temas máis recoñecidos. O meu favorito sempre foi o que lle dá nome ao seu primeiro disco, Paralaia.

Por todo isto e moito máis, non vos podedes perder esta XXXI edición do Festival Internacional do Mundo Celta de Ortigueira. Déixovos o vídeo promocional de Budiño para esta edición.

 

🙂

 

 

A gaiteira Cristina Pato volve a Ortigueira

É galega e faino notar alí por onde vai. E xa non soamente porque toque (e moi ben) o noso instrumento máis representativo. As persoas que a seguimos nas redes sociais dámonos de conta do orgullosa que se sinte da súa Galicia e que, cada vez que fai un oco na súa apretada axenda, volve para o seu Ourense. A pasada fin de semana compartiu no seu Facebook unha foto dende a cidade das termas coa súa querida (e “tocaia” miña) Maruxa.

Asemella que facía calor pola cidade das termas… Pero Cristina, non te preocupes, que o venres 17 de xullo asegurámosche que as temperaturas en Ortigueira serán máis baixiñas. Ou se cadra non, porque vaia noite de música nos espera! Abrirá a xornada a banda escocesa The Vale of Atholl Pipe Band e de aí subirá ao escenario principal a banda anfitriona, a Escola de Gaitas de Ortigueira. Estou segura que a Escola de Gaitas deixará o ambiente máis que caldeado para recibir no escenario a Cristina Pato Band ás 23.30 horas.

“Unha virtuosa explosión de enerxía”

Iso é o que dixo nin máis nin menos que o xornal The New York Times de Cristina Pato. E dende The Wall Street Journal defínena como “unha das mestras vivas da gaita”. O certo é que Cristina Pato leva moitos anos levando a nome de Galicia e da nosa gaita polo mundo adiante. Pero Cristina é moito máis ca iso. No ano 1999 convertíase na primeira muller gaiteira en publicar un álbum en solitario e dende ese intre, a súa carreira non parou. É gaiteira, pianista, compositora e ata cantante. Comezou adicándose á música galega pero dende hai varios anos a súa carreira está ao lado da música clásica, do jazz e da música latina. O mellor de todo é que Cristina Pato é quen de mesturar moitos deses xéneros e crear melodías coma as que podemos escoitar no seu último traballo, Latina. 

En palabras súas, “Latina é unha maneira de abrazar a miña herencia cultura a través da música, explorando as conexións entre o país de orixe da palabra, Italia, e os países que hoxe en día consideramos latinos”. Pato conta que “usando a metáfora dun dos ritmos esenciais da música tradicional, o 6/8, Latina é unha viaxe musical que comeza coa tarantella italiana e viaxa a través de ritmos 6/8 de España e América Latina, coma o joropo venezolano, o Landó peruano, a muiñeira galega, e ritmos que teñen viaxado en ámbolos dous sentidos no mundo latino, o tanguillo e o fandango”.

De seguro fará vibrar ao público de Ortigueira o venres 17 de xullo ás 23.30 horas da noite. Non volo perdades, será todo un espectáculo de calidade musical.

😉

 

 

Trens e buses para chegar a Ortigueira

Poido imaxinar que a estas alturas do mércores moitos de vós estades cos últimos preparativos para pór maña camiño a Ortigueira. Ou, se non sodes tan afortunados (como é o meu caso), o faredes o venres ou sábado. Por iso, quérovos facer un pequeno resumo de todas as posibilidades que tendes para chegar ao Mundo Celta.

Primeiro de todo, o mellor é esquecerse do coche, xa que non poderedes acceder á acampada con el e, ademais, dende a estación de tren e autobuses teredes servizo de buses urbanos cos que poderedes acceder á praia con todos os vosos bártulos (que non serán pocos). O prezo do autobús urbano será de 1 euro por viaxe, pero os que viaxen dende o aparcadoiro oficial e non sexan usuarios deste, deberán de aboar 3 euros. 

En tren 

A compañía ferroviaria RENFE multiplica as prazas ofertadas dende a estación de Ferrol. Pero, ademais, os traxectos ao Festival de Ortigueira contarán cun desconto do 30% nos trens de longa distancia, rexionais ou os que saian dende Ferrol. Estes descontos comezaron no día de onte e estenderase ata o martes día 22 de xullo.

Se queres acceder ao tutorial para a compra online do billete con desconto fai click AQUÍ.

Para imprimir a autorización de desconto fai click AQUÍ. 

En autobús

Dende o día de hoxe ata o domingo día 20, a compañía Arriva reforza as liñas que unen as principais cidades galegas con Ortigueira. Desta maneira, puxéronse en marcha buses de lanzadeira dende Santiago, A Coruña, Ferrol, Lugo, Ourense e Viveiro.

Así que xa sabedes, son moitas as posibilidades que tendes para achegarvos a Ortigueira e vivir unha trigésima edición que será “para o recordó”.

Lévalo dentro?? Pois a Ortigueira a sentilo! 🙂

@MariaQuintiana

Únete ás Free Sessions e toca no Festival de Ortigueira

Tocas algún instrumento? Formas parte dalgún grupo? Se é así, estás de sorte porque unha das grandes novidades da trixésima edición do Mundo Celta é a posta en marcha das denominadas Free Sessions, unha iniciativa coa que se vos quere dar a oportunidad de debutar no Festival de Ortigueira. O lugar elixido para a ocasión é a Praza de Isabel II, o venres ás 12.00 e 20.00 horas e o sábado ás 20.00 horas. A organización porá á vosa disposición un palco e un equipo de son.

Como anotarse ás Free Sessions?

É ben doado. Soamente tes que achegarte á mesa de son antes das horas fixadas para cada sesión. Unha vez se poña en marcha, cada grupo contará con un total de 30 minutos para deleitar ao público de Ortigueira. Ídesvos perder esta oportunidade?

Se tendes conta de Facebook, non dubidedes en unirvos a este evento. Aí poderes facer as vosas suxerencias ou preguntar calquera dúbida que vos poida xurdir con respecto ás Free Sessions.

 

Para acceder ao evento do Festival de Ortigueira fai click AQUÍ.

Animádevos! Eu, de seguro, o farei. 😉

 

@MariaQuintiana

Todo en marcha en Ortigueira para a noite dos “Runas”

Escenario Alameda 2014. Foto: Laura Pedre

O Escenario Alameda xa está a punto para a súa inauguración na primeira xornada de festa na vila. Será o xoves ás 22.00 horas da man dos tres finalistas do “Proxecto Runas” e de Pepe Vaamonde Grupo, encargados de pór o fin á primeira noite do Festival de Ortigueira. A mesma tarde do xoves, a Praza de Isabel II acollerá ás 20.00 horas a inauguración musical da trixésima edición do Mundo Celta, e ás 17.00 horas terá lugar a apertura oficial da Feira de Artesanía do paseo marítimo, a exposición fotográfica do Claustro do Concello e a mostra “30 anos de Festival” de carteis históricos no Centro de recepción de visitantes.

Panorámica do recinto da Alameda. Foto: Bruno Lozano

 

Que grupos protagonizan o “Proxecto Runas” 2014? 

Este ano os finalistas son dúas bandas galegas, Tiruleque e Cuarteto Caramuxo, e Xabi Aburruzaga Band, do País Vasco. As tres bandas competirán na noite do xoves para acadar algún dos premios de 5.000, 3.000 o 2.000 euros que se entregarán. Ademais, os  gañadores convertiranse no pimeiro grupo confirmado para actuar na edición 2015 do Festival de Ortigueira.

Tiruleque

Os Tiruleque chegan como finalistas ao “Proxecto Runas” por segunda vez, logo de que xa o foran no ano 2009. Este grupo galego conta cunha carreira musical que ven de cumprir 12 anos, un tempo no que lles deu tempo para autoproducir dous discos, Tiruleque (2009) e Mu!! (2013). Son sete membros saídos da música tradicional galega que apostan polo arranxo de melodías populares galegas, botando man da riqueza coa que contan os instrumentos tradicionais e, ademais, experimentando no uso das tonalidades e modos.

Cuarteto Caramuxo

O Cuarteto Caramuxo, composto por catro clarinetistas, un acordeonista e unha percusionistas (si, é un cuarteto de seis músicos 😉 ), bebe das melodías dos cancioneiros populares galegos, polo que o público de Ortigueira bailará ao son de música popular galega e, como non, dalgunhas composicións máis contemporáneas. O Escenario Alameda será o lugar elixido para adiantar temas do seu segundo álbume, sempre cunha interpretación “con gusto” no que o máis importante é gozar da música.

Xabi Aburruzaga Band

Xabi Aburruzaga Band, encabezada polo trikitilari biscaíño, volve ser finalista do “Proxecto Runas” por segunda vez logo de que tamén o conseguise na edición de 2010. Desta maneira, pisará o Escenario Alameda para presentar o seu novo álbume “Geure”, no que aposta pola mestura entre tradición e modernidade e no que se pode atopar sons que van dende o folk ata o jazz. Este meso ano Xabi Aburruzaga colaborou con Carlos Núñez no concerto de presentación do último disco do galego, no que tamén estiveron membros de The Chieftains. Ademais, cabe destacar que o biscaíño é o finalista do “Proxecto Runas” que máis puntuación acadou.

 

Que vos parece? A min tenme moi boa pinta. Mágoa que ata o venres non poida estar en Ortigueira. Pero de seguro terei quen me conte como foron as actuacións! 🙂

Sabedes xa como ides ir ata Ortigueira? Mañá contareivos os servicios especiais de Renfe e Arriva para o Mundo Celta. Ademais, tamén vos contarei como poderedes convertirvos en protagonistas do Festival Ortigueira por uns minutiños.

@MariaQuintiana

 

“Temos un dos mellores carteis dos últimos anos”

A Escola de Gaitas de Ortigueira, anfitriona do Festival do Mundo Celta, tamén está en plena conta atrás para o comezo do trixésimo Festival de Ortigueira, unha edición que, en palabras do seu presidente, Bruno Lozano, conta “cun dos mellores carteis dos últimos anos”.  E é que xa pasou moito tempo dende que membros da Escola de Gaitas visitaran o afamado Festival de Lorient do que volverían cunha única idea na cabeza: Ortigueira merecía ter un evento como aquel ou, alo menos, semellante. E vaia se o conseguiron. Gracias a eles e, como non, á Escola de Gaitas en xeral e moitas outras persoas, hoxe en día podemos falar dun Festival que leva o nome de Ortigueira ata os lugares máis recónditos e que, ademais, é quen de converter a nosa vila na capital da música celta e no escenario no que moitos artistas de renome soñan con actuar.

Bruno Lozano, presidente da Escola de Gaitas

“O espírito mantense porque o Festival é a esencia da Escola de Gaitas. Cando se produce o relevo xeracional, inevitable neste tipo de asociacións, os que entran novos chegan coa lección ben aprendida. Os rapaces teñen moitas ganas; é o noso Festival, xogamos na casa”, afirma o presidente da Escola de Gaitas, ademais de comentar que están inmersos nos preparativos para a chegada de todas as bandas a Ortigueira. “Encargámonos da organización de todo o que ten relación coa sección de bandas do Festival, e non soamente actuacións, senón que nos ocupamos tamén do seu aloxamento. Tratamos de que estean o máis cómodos posible na súa estancia en Ortigueira”. De feito, a Escola de Gaitas quere que as bandas desfruten do Festival alén das súas actuacións e que coñezan como é verdadeiramente o Festival de Ortigueira: “adoitamos facilitar a estancia a todas as bandas que tocan o domingo, independientemente que soamente  o fagan o domingo, convidándoas a vir o sábado e desfrutar, polo menos, do día grande da festa”.

E é que o IES de Ortigueira tense convertido no cuartel de todas as bandas de gaitas que chegan á vila. Alí descansan, ensaian, calman os nervios… Pero converter as aulas en improvisadas habitacións para todos eses días leva o seu esforzo. De feito, o presidente asegura que “sen a colaboración do director do IES de Ortigueira, Carlos Legarreta, o noso traballo sería moito máis complicado. Por iso querémoslle agradecer a súa labor e, como non, ás nais e pais que nestes días traballan tanto coma nós”.

Escola de Gaitas de Ortigueira

En canto a se teñen preparada alguna sorpresa como banda invitada á actuación dalgún dos grupos que actuarán no Escenario Alameda, como podería ser The Chieftains, o presidente nin confirma nin desmente. O que si asegura é que, na súa actuación no escenario principal, a Escola de Gaitas interpretará “tanto clásicos da banda como temas novos para conseguir darlle un pouco máis de espectáculo á nosa actuación no Escenario Alameda”.

“O Festival de Ortigueira merece da creación dun premio honorífico anual”

Pero aproveitando a miña conversa con Bruno Lozano, pedínlle que imaxinase, por só un intre, que o vindeiro ano sería proposto como director do Mundo Celta. Desta maneira, pedinlle que me dixese dúas das cousas que incorporaría ao Festival.  “O meu compañeiro Alberto Gómez e máis eu levamos anos dándolle voltas a unha idea: entregar un premio honorífico anual que leve o selo do Festival. Pero entregalo noutra data, por exemplo, en Marzo, para non centrar todo o peso do Festival en 4 días ó ano. Por outro lado, sen dúbida, apostaríamos por contar cunha maior representación de Galicia no cartel; incluso dedicar un dos días unicamente ao noso país”. Aí queda, por se alguén quere tomar nota.

A Escola de Gaitas de Ortigueira, que conta con casi 35 membros en activo e aproximadamente 60 se se ten en conta a canteira, abrirá a sesión de concertos do Escenario Alameda a noite do venres día 18 de xullo ás 22.00 horas. Non volo perdades; eu, de seguro que non. 😉

Aquí vos deixo a actuación do ano pasado 🙂

@MariaQuintiana

 

 

 

The Chieftains volven a Ortigueira despois de dez anos

É, sen lugar a dúbidas, a banda de música tradicional irlandesa máis importante das últimas cinco décadas. Ás súas costas levan prestixiosos galardóns, como seis premios Grammy e un Emmy. Nos seus máis de 50 anos de historia compartiron escenario con músicos do talle de Micc Jagger, The Dubliners, Sting ou Luciano Pavarotti. Este ano encabezan o cartel da que será a triséxima edición do Festival Internacional do Mundo Celta de Ortigueira

Festival Internacional do Mundo Celta de Ortigueira 2004

Que felicidade poder comezar esta tempada do blogue do Festival de Ortigueira comentado unha nova como é esta, a incorporación ao cartel dos maxestuosos The Chieftains. Tivemos que esperar exactamente dez anos para que os de Dublín volvense ao Mundo Celta, pero estou segura de que esta desacougante espera mereceu a pena.

Aínda que por aquel entón eu aínda fose moi nova, o certo é que recordo perfectamente o mes de xullo de 2004,  ano no que se celebraba a vixésima edición do Festival. Pero como para non lembralo. The Chieftains subían ao escenario de Ortigueira e, para ledicia de todos os festivaleiros alí presentes, o facían acompañados polo noso gaiteiro máis internacional, Carlos Núñez. Daquela andaban envoltos nunha xira que os levaría por moitos lugares, entre eles o Parque de Castrelos de Vigo, concerto do que sairía o soberbio traballo “Carlos Núñez & Amigos En

Foto: Álvaro Fdz. Polo

Casa”. Compartían escenario, ademais, coa acordeonista Sharon Shanon, a National Youth Pipe Band of Scotland e o cantante arxentino, León Gieco, entre outros. E todos eles tamén viñeron a Ortigueira. En resumidas contas, todo un luxazo, porque puidemos desfrutar dun gran espectáculo cheo de enerxía, baile e, sobre todo, de música e rítmo inmellorable.

Pero este ano non será menos. De seguro Paddy Moloney e compañía terán preparado un gran concerto cheo de sorpresas. Quen sabe? Igual chegan con alguna colaboración inesperada. Ogallá así sexa. Pero, ata entón…

Que podemos esperar de The Chieftains o 19 de xullo en Ortigueira?

Polo momento póidovos comentar o que moitos de vós xa sabedes. Voice of Age é o seu útlimo álbume de estudo, que saíu ao mercado no ano 2012, e no que fusionan os seus sons tradicionais irlandeses coas melodías chegadas dende reputados nomes do indie-rock e do “country”, así como do folk escocés e irlandés. Desta maneira, os de Dublín faranos vibrar con senllas fusións pero, ademais, coas melodías que ateigan os máis de corenta traballos discográficos que teñen editados dende que comezaron a súa andaina no ano 1962. Iso si, do que estou segura é dunha cousa: a “Muiñeira de Chantada” non faltará. Abrimos apostas? 🙂

@MariaQuintiana