Trens e buses para chegar a Ortigueira

Poido imaxinar que a estas alturas do mércores moitos de vós estades cos últimos preparativos para pór maña camiño a Ortigueira. Ou, se non sodes tan afortunados (como é o meu caso), o faredes o venres ou sábado. Por iso, quérovos facer un pequeno resumo de todas as posibilidades que tendes para chegar ao Mundo Celta.

Primeiro de todo, o mellor é esquecerse do coche, xa que non poderedes acceder á acampada con el e, ademais, dende a estación de tren e autobuses teredes servizo de buses urbanos cos que poderedes acceder á praia con todos os vosos bártulos (que non serán pocos). O prezo do autobús urbano será de 1 euro por viaxe, pero os que viaxen dende o aparcadoiro oficial e non sexan usuarios deste, deberán de aboar 3 euros

En tren 

A compañía ferroviaria RENFE multiplica as prazas ofertadas dende a estación de Ferrol. Pero, ademais, os traxectos ao Festival de Ortigueira contarán cun desconto do 30% nos trens de longa distancia, rexionais ou os que saian dende Ferrol. Estes descontos comezaron no día de onte e estenderase ata o martes día 22 de xullo.

Se queres acceder ao tutorial para a compra online do billete con desconto fai click AQUÍ.

Para imprimir a autorización de desconto fai click AQUÍ. 

En autobús

Dende o día de hoxe ata o domingo día 20, a compañía Arriva reforza as liñas que unen as principais cidades galegas con Ortigueira. Desta maneira, puxéronse en marcha buses de lanzadeira dende Santiago, A Coruña, Ferrol, Lugo, Ourense e Viveiro.

Captura de pantalla 2014-07-16 21.20.10

Así que xa sabedes, son moitas as posibilidades que tendes para achegarvos a Ortigueira e vivir unha trigésima edición que será “para o recordó”.

Lévalo dentro?? Pois a Ortigueira a sentilo! 🙂

@MariaQuintiana

Advertisements

Únete ás Free Sessions e toca no Festival de Ortigueira

Tocas algún instrumento? Formas parte dalgún grupo? Se é así, estás de sorte porque unha das grandes novidades da trixésima edición do Mundo Celta é a posta en marcha das denominadas Free Sessions, unha iniciativa coa que se vos quere dar a oportunidad de debutar no Festival de Ortigueira. O lugar elixido para a ocasión é a Praza de Isabel II, o venres ás 12.00 e 20.00 horas e o sábado ás 20.00 horas. A organización porá á vosa disposición un palco e un equipo de son.

Como anotarse ás Free Sessions?

É ben doado. Soamente tes que achegarte á mesa de son antes das horas fixadas para cada sesión. Unha vez se poña en marcha, cada grupo contará con un total de 30 minutos para deleitar ao público de Ortigueira. Ídesvos perder esta oportunidade?

Se tendes conta de Facebook, non dubidedes en unirvos a este evento. Aí poderes facer as vosas suxerencias ou preguntar calquera dúbida que vos poida xurdir con respecto ás Free Sessions.

Free Sessions

 

Para acceder ao evento do Festival de Ortigueira fai click AQUÍ.

Animádevos! Eu, de seguro, o farei. 😉

 

@MariaQuintiana

Todo en marcha en Ortigueira para a noite dos “Runas”

Escenario Alameda 2014. Foto: Laura Pedre
Escenario Alameda 2014. Foto: Laura Pedre

O Escenario Alameda xa está a punto para a súa inauguración na primeira xornada de festa na vila. Será o xoves ás 22.00 horas da man dos tres finalistas do “Proxecto Runas” e de Pepe Vaamonde Grupo, encargados de pór o fin á primeira noite do Festival de Ortigueira. A mesma tarde do xoves, a Praza de Isabel II acollerá ás 20.00 horas a inauguración musical da trixésima edición do Mundo Celta, e ás 17.00 horas terá lugar a apertura oficial da Feira de Artesanía do paseo marítimo, a exposición fotográfica do Claustro do Concello e a mostra “30 anos de Festival” de carteis históricos no Centro de recepción de visitantes.

Panorámica do recinto da Alameda. Foto: Bruno Lozano
Panorámica do recinto da Alameda. Foto: Bruno Lozano

 

Que grupos protagonizan o “Proxecto Runas” 2014? 

Este ano os finalistas son dúas bandas galegas, Tiruleque e Cuarteto Caramuxo, e Xabi Aburruzaga Band, do País Vasco. As tres bandas competirán na noite do xoves para acadar algún dos premios de 5.000, 3.000 o 2.000 euros que se entregarán. Ademais, os  gañadores convertiranse no pimeiro grupo confirmado para actuar na edición 2015 do Festival de Ortigueira.

Tiruleque
Tiruleque

Os Tiruleque chegan como finalistas ao “Proxecto Runas” por segunda vez, logo de que xa o foran no ano 2009. Este grupo galego conta cunha carreira musical que ven de cumprir 12 anos, un tempo no que lles deu tempo para autoproducir dous discos, Tiruleque (2009) e Mu!! (2013). Son sete membros saídos da música tradicional galega que apostan polo arranxo de melodías populares galegas, botando man da riqueza coa que contan os instrumentos tradicionais e, ademais, experimentando no uso das tonalidades e modos.

Cuarteto Caramuxo
Cuarteto Caramuxo

Cuarteto Caramuxo, composto por catro clarinetistas, un acordeonista e unha percusionistas (si, é un cuarteto de seis músicos 😉 ), bebe das melodías dos cancioneiros populares galegos, polo que o público de Ortigueira bailará ao son de música popular galega e, como non, dalgunhas composicións máis contemporáneas. O Escenario Alameda será o lugar elixido para adiantar temas do seu segundo álbume, sempre cunha interpretación “con gusto” no que o máis importante é gozar da música.

Xabi Aburruzaga Band
Xabi Aburruzaga Band

Xabi Aburruzaga Band, encabezada polo trikitilari biscaíño, volve ser finalista do “Proxecto Runas” por segunda vez logo de que tamén o conseguise na edición de 2010. Desta maneira, pisará o Escenario Alameda para presentar o seu novo álbume “Geure”, no que aposta pola mestura entre tradición e modernidade e no que se pode atopar sons que van dende o folk ata o jazz. Este meso ano Xabi Aburruzaga colaborou con Carlos Núñez no concerto de presentación do último disco do galego, no que tamén estiveron membros de The Chieftains. Ademais, cabe destacar que o biscaíño é o finalista do “Proxecto Runas” que máis puntuación acadou.

 

Que vos parece? A min tenme moi boa pinta. Mágoa que ata o venres non poida estar en Ortigueira. Pero de seguro terei quen me conte como foron as actuacións! 🙂

Sabedes xa como ides ir ata Ortigueira? Mañá contareivos os servicios especiais de Renfe e Arriva para o Mundo Celta. Ademais, tamén vos contarei como poderedes convertirvos en protagonistas do Festival Ortigueira por uns minutiños.

@MariaQuintiana

 

“Temos un dos mellores carteis dos últimos anos”

A Escola de Gaitas de Ortigueira, anfitriona do Festival do Mundo Celta, tamén está en plena conta atrás para o comezo do trixésimo Festival de Ortigueira, unha edición que, en palabras do seu presidente, Bruno Lozano, conta “cun dos mellores carteis dos últimos anos”.  E é que xa pasou moito tempo dende que membros da Escola de Gaitas visitaran o afamado Festival de Lorient do que volverían cunha única idea na cabeza: Ortigueira merecía ter un evento como aquel ou, alo menos, semellante. E vaia se o conseguiron. Gracias a eles e, como non, á Escola de Gaitas en xeral e moitas outras persoas, hoxe en día podemos falar dun Festival que leva o nome de Ortigueira ata os lugares máis recónditos e que, ademais, é quen de converter a nosa vila na capital da música celta e no escenario no que moitos artistas de renome soñan con actuar.

Bruno Lozano, presidente da Escola de Gaitas
Bruno Lozano, presidente da Escola de Gaitas

“O espírito mantense porque o Festival é a esencia da Escola de Gaitas. Cando se produce o relevo xeracional, inevitable neste tipo de asociacións, os que entran novos chegan coa lección ben aprendida. Os rapaces teñen moitas ganas; é o noso Festival, xogamos na casa”, afirma o presidente da Escola de Gaitas, ademais de comentar que están inmersos nos preparativos para a chegada de todas as bandas a Ortigueira. “Encargámonos da organización de todo o que ten relación coa sección de bandas do Festival, e non soamente actuacións, senón que nos ocupamos tamén do seu aloxamento. Tratamos de que estean o máis cómodos posible na súa estancia en Ortigueira”. De feito, a Escola de Gaitas quere que as bandas desfruten do Festival alén das súas actuacións e que coñezan como é verdadeiramente o Festival de Ortigueira: “adoitamos facilitar a estancia a todas as bandas que tocan o domingo, independientemente que soamente  o fagan o domingo, convidándoas a vir o sábado e desfrutar, polo menos, do día grande da festa”.

E é que o IES de Ortigueira tense convertido no cuartel de todas as bandas de gaitas que chegan á vila. Alí descansan, ensaian, calman os nervios… Pero converter as aulas en improvisadas habitacións para todos eses días leva o seu esforzo. De feito, o presidente asegura que “sen a colaboración do director do IES de Ortigueira, Carlos Legarreta, o noso traballo sería moito máis complicado. Por iso querémoslle agradecer a súa labor e, como non, ás nais e pais que nestes días traballan tanto coma nós”.

Escola de Gaitas de Ortigueira
Escola de Gaitas de Ortigueira

En canto a se teñen preparada alguna sorpresa como banda invitada á actuación dalgún dos grupos que actuarán no Escenario Alameda, como podería ser The Chieftains, o presidente nin confirma nin desmente. O que si asegura é que, na súa actuación no escenario principal, a Escola de Gaitas interpretará “tanto clásicos da banda como temas novos para conseguir darlle un pouco máis de espectáculo á nosa actuación no Escenario Alameda”.

“O Festival de Ortigueira merece da creación dun premio honorífico anual”

Pero aproveitando a miña conversa con Bruno Lozano, pedínlle que imaxinase, por só un intre, que o vindeiro ano sería proposto como director do Mundo Celta. Desta maneira, pedinlle que me dixese dúas das cousas que incorporaría ao Festival.  “O meu compañeiro Alberto Gómez e máis eu levamos anos dándolle voltas a unha idea: entregar un premio honorífico anual que leve o selo do Festival. Pero entregalo noutra data, por exemplo, en Marzo, para non centrar todo o peso do Festival en 4 días ó ano. Por outro lado, sen dúbida, apostaríamos por contar cunha maior representación de Galicia no cartel; incluso dedicar un dos días unicamente ao noso país”. Aí queda, por se alguén quere tomar nota.

A Escola de Gaitas de Ortigueira, que conta con casi 35 membros en activo e aproximadamente 60 se se ten en conta a canteira, abrirá a sesión de concertos do Escenario Alameda a noite do venres día 18 de xullo ás 22.00 horas. Non volo perdades; eu, de seguro que non. 😉

Aquí vos deixo a actuación do ano pasado 🙂

@MariaQuintiana

 

 

 

Festival Ortigueira: “Lévalo dentro. Sínteo”

Lévalo dentro. SínteoE ben que sinto, a pesar dos case 2000 quilómetros que me separan de Ortigueira, como a trixésima edición do Mundo Celta está a piques de dar comezo. Tan só faltan 11 días para que as rúas de Santa  Marta e a praia de Morouzos se enchan de verdadeiros aventureiros e, sobre todo, de amantes do folk que chegan á nosa vila para desfrutar dunha edición que, en palabras da organización, será “para o recordo”. Soamente hai que botar unha ollada ao cartel de excepción para darse de conta da calidade musical que haberá no Escenario Alameda. Sen dúbida, esta 30 edición marcará un antes e un despois na historia de este evento declarado, no ano 2005, de interese turístico internacional.

Este ano a organización aposta pola introdución dunha serie de novidades, novidades que, dende o meu punto de vista, pasan a ser sinónimo de acertos. E é que se converten nunha piscadela aos primeiros Festivais, un feito ao que, de seguro, os festivaleiros de toda a vida lle darán unha gran benvida. Desta maneira, a 30 edición quizáis sexa o punto de inflexión para o comezo dunha nova etapa marcada pola proximidade aos primeiros anos do Mundo Celta.

As claves da nova edición 

Alén das grandes cabezas do cartel como son The Chieftains, embaixadores por excelencia da música irlandesa a nivel internacional, e Milladoiro, grupo clave no nacemento do Festival, participando consecutivamente desde o ano 1979 ata o 1985, esta edición conta cunha serie de claves que merece a pena ter en conta:

Presentador do Festival Ortigueira 2014
Presentador do Festival Ortigueira 2014

Volve a figura do presentador. Carlos Blanco, actor e comediante galego, será o encargado de manter ao público no punto máis alxido durante as xornadas de concertos no Escenario Alameda. Hai uns anos, con motivo do XXV aniversario do Festival, o actor contaba que “eu só fun unha vez ao Festival de Ortigueira. Pero o festival de Ortigueira veu onda min moitas veces. É verdade. Onda min, e onda todos nós. Viñan cada verán, chegaban ao pobo, tocaban polas rúas, pedían cos seus cans. Normalmente pedían elas, encantadoras, e tocaban eles, fumadísimos”. Quen lle ía dicir por aquel entón que o Festival de Ortigueira acudiría de novo a el, dunha maneira tan directa, para convertilo no mestre de ceremonias da 30 edición…

Nacen as “free sessions”. A Praza de Isabel II convertirase no punto de encontro no que calquera grupo (previa inscripción o mesmo día) poderá animar á vila e aos seus visitantes (venres ás 20.00 horas e sábado ás 12.00 e  20.00 horas).

Concurso de Gaita Solista e Cuarteto Tradicional. Terán lugar, respectivamente, o venres 18 ás 16.00 horas e o sábado 19 ás 17.00 horas, na Praza de Isabel II.

Obradoiros a cargo da Dominic Graham School of Irish dance. O director da agrupación introducirá no baile tradicional irlandés o venres a partir das 16.00 horas aos máis pequenos, ás 17.00 horas aos mozose adultos e, finalmente, un ensaio conxunto.

 

Así que xa sabedes, ide preparando a viaxe a Ortigueira. Nos próximos días comentareivos os diferentes servizos especiais de autobuses e trens dos que dispoñeredes para chegar ao Festival…  Moito mellor que coller o coche! 😉

Aquí vos deixo esta viñeta de Faro de Vigo do pasado sábado, cunha posible “Real Banda de Gaitas de Ourense” moi galáxica camiño de Ortigueira 🙂

 

 

@MariaQuintiana

The Chieftains volven a Ortigueira despois de dez anos

É, sen lugar a dúbidas, a banda de música tradicional irlandesa máis importante das últimas cinco décadas. Ás súas costas levan prestixiosos galardóns, como seis premios Grammy e un Emmy. Nos seus máis de 50 anos de historia compartiron escenario con músicos do talle de Micc Jagger, The Dubliners, Sting ou Luciano Pavarotti. Este ano encabezan o cartel da que será a triséxima edición do Festival Internacional do Mundo Celta de Ortigueira

Festival Internacional do Mundo Celta de Ortigueira 2004
Festival Internacional do Mundo Celta de Ortigueira 2004

Que felicidade poder comezar esta tempada do blogue do Festival de Ortigueira comentado unha nova como é esta, a incorporación ao cartel dos maxestuosos The Chieftains. Tivemos que esperar exactamente dez anos para que os de Dublín volvense ao Mundo Celta, pero estou segura de que esta desacougante espera mereceu a pena.

Aínda que por aquel entón eu aínda fose moi nova, o certo é que recordo perfectamente o mes de xullo de 2004,  ano no que se celebraba a vixésima edición do Festival. Pero como para non lembralo. The Chieftains subían ao escenario de Ortigueira e, para ledicia de todos os festivaleiros alí presentes, o facían acompañados polo noso gaiteiro máis internacional, Carlos Núñez. Daquela andaban envoltos nunha xira que os levaría por moitos lugares, entre eles o Parque de Castrelos de Vigo, concerto do que sairía o soberbio traballo “Carlos Núñez & Amigos En

"Miradas", de Álvaro Fdz. Polo
Foto: Álvaro Fdz. Polo

Casa”. Compartían escenario, ademais, coa acordeonista Sharon Shanon, a National Youth Pipe Band of Scotland e o cantante arxentino, León Gieco, entre outros. E todos eles tamén viñeron a Ortigueira. En resumidas contas, todo un luxazo, porque puidemos desfrutar dun gran espectáculo cheo de enerxía, baile e, sobre todo, de música e rítmo inmellorable.

Pero este ano non será menos. De seguro Paddy Moloney e compañía terán preparado un gran concerto cheo de sorpresas. Quen sabe? Igual chegan con alguna colaboración inesperada. Ogallá así sexa. Pero, ata entón…

Que podemos esperar de The Chieftains o 19 de xullo en Ortigueira?

Polo momento póidovos comentar o que moitos de vós xa sabedes. Voice of Age é o seu útlimo álbume de estudo, que saíu ao mercado no ano 2012, e no que fusionan os seus sons tradicionais irlandeses coas melodías chegadas dende reputados nomes do indie-rock e do “country”, así como do folk escocés e irlandés. Desta maneira, os de Dublín faranos vibrar con senllas fusións pero, ademais, coas melodías que ateigan os máis de corenta traballos discográficos que teñen editados dende que comezaron a súa andaina no ano 1962. Iso si, do que estou segura é dunha cousa: a “Muiñeira de Chantada” non faltará. Abrimos apostas? 🙂

@MariaQuintiana

Vamos, que comeza!

Todo a punto para que dea comezo a segunda xornada de festa na vila de Ortigueira. O grupo coruñés Birimbao abrirá a noite na que ademais ten lugar o tradicional concierto da anfitriona do Mundo Celta, a Escola de Gaitas de Ortigueira. Estes tocarán de segundos e, de seguro, farán unha actuación á altura. Coma sempre.

Os grupos Kan e Guidewires serán os encargados de quentar aos folkies da Alameda. Como tamén o fará a banda viguesa Riobó que será quen poña o peche aos concertos do escenario Estrella Galicia.

20130712-221917.jpg

En Morouzos bo ambiente, sobre todo, porque a acampada sona por fin a folk e celta, como debe ser nun festival coma este. E moita xente con ganas de pasalo ben!

Que comece a segunda noite en Ortigueira!!

Lumeee!!

Ortigueira xa é a capital da música celta

E parece que non eran argalladas miñas nin imaxinacións que puideran xurdir do meu “frikismo” confesable por este festival as que fixeran que este mediodía vise festivaleiros onde non os había. Está comprobado que é inconfundible saber cando unha persoa vai para o Festival Ortigueira e cando non…

A Liña 5 do servizo de transporte urbano de Santiago que, para os que non o coñezades, é a que enlaza o centro da cidade coa Estación de Autobuses, ás 13.45 horas deste mediodía ía recollendo en difrentes paradas a rapaces e rapazas con tenda de campaña en man e mochilas de bos viaxeiros ao lombo. Ademais, roupa cómoda e, como non, cartón de viño á vista. Si, poderían ir para calquera outro festival ou mesmo para unha simple acampada de amigos. Pero estaba claro que non, e non me equivoquei. Mirei os horarios das liñas especiais para o Mundo Celta e, efectivamente, non me equivocaba. Ás 14:30 horas tiña saída o segundo autobús do día para o festival e, obviamente, hai que ir con tempo para non quedar en terra e ter que esperar ás 19.00 horas a que saia outro… O tempo en Ortigueira é ouro, e canto antes se estea alí, mellor. Que envexa me deron…

 

20130711-223732.jpg
O primeiro concerto do Festival 2013
(D. Pérez)

Agora, de seguro, algún deles estará xa na acampada de Mourozos ou na Alameda escoitando aos Runas como están todos eses festivaleiros nesa foto que me acaban de enviar dende Ortigueira…

E é que xa está aquí, agora si que si o poido dicir aínda que sexa dende Compostela…

Arranca a XXIX edición do Festival Internacional do Mundo Celta de Ortigueira.

Lume Ortigueira!!!!!! Vémonos mañá!!

Menos de 28 horas para o Festival Ortigueira…

Folkies na parada de autobús urbano no 2011 (B. Area)
Folkies na parada de autobús urbano no 2011
(B. Area)

… E case todo listo. De feito, recórdovos aos que vaiades coller o coche para achegarse a Ortigueira que teñades en conta que á acampada de Morouzos unicamente se pode acceder a pé, en autobús urbano (1 euro a viaxe) ou en taxi. Así, habilítase un aparcadoiro oficial vixiado localizado preto do núcleo urbano (de pagamento) e tamén se permite o estacionamento dos vehículos no polígono industrial de Cuiña de forma gratuíta (sen vixilancia). Do mesmo xeito, lembrar tamén que para acceder ao camping é necesario pasar un control de seguridade, seguindo a liña comezada na pasada edición “no empeño de mellorar a seguridade e rematar con actividades molestas que proliferaron neste ámbito os últimos anos”. Así, impídese o acceso a Morouzos “con maquinaria como xeneradores, pranchas de cociña, bombonas de gas, aparellos de música potentes, altofalantes ou amplificadores…”.

Logo deste pequeno recordatorio, dicirvos que as prediccións meteorolóxicas continúan a ser máis que favorables. Se os que adoitades vir a Ortigueira non o podedes crer, os que somos de Ortigueira aínda menos. Pero parece que este ano si que se vai converter nunha realidade e que contaremos cun festival que, ademais de contar con boa música, contará tamén con bo tempo.

Polo tanto, boa música, bo tempo, boa compaña, bo ambiente, unha máis que boa (por non dicir a mellor) zona de acampada enclavada nunha paraxe natural impresionante… E todo o que cada un de vós lle queirades engadir, sempre que poida ir da man do adxectivo bo/boa, é o que poderedes atopar en Ortigueira. Así que xa non hai excusas para deixar de asistir ao único festival de balde de toda a península, un festival declarado de interese turístico internacional no ano 2005 e polo que teñen pasado as mellores bandas do celta e do folk a nivel internacional. Por algo será…

Catro días para o Festival Ortigueira

Bruno Area
Bruno Area

Agora si que si, xa está aquí. Mañá da comezo a semana na que Ortigueira se converte ano tras ano na capital da música celta. E parece que xa comeza a estar todo case listo. Chégame dende Ortigueira unha imaxe da Alameda e o escenario Estrella Galicia xa está a punto para que o xoves se suban ao escenario as bandas noveis do Proxecto Runas, que unha vez máis se encargarán de abrir as noites de festa de Ortigueira. Non vos esquezades de que este ano haberá máis que o Runas. Os encargados de pechar a noite serán os ferroláns Os Cempés que chegan a Ortigueira para presentar o seu último disco, “Tentemozo”.

Transporte urbano no Festival Ortigueira

A compañía Arriva Noroeste pón en marchan nesta edición o servizo de autobuses urbanos e o prezo da viaxe será de tan só un euro. O primeiro autobús sairá o xoves ás 18.00 horas dende o Parking e o itinerario sempre será o mesmo: Parking-Estación de Autobuses-Praia-Estación de Autobuses-Parking. Este transpoerte estará en marcha os catro días que dura o Festival.

Déixovos a ligazón no que podedes consultar todos os horarios. Só tendes que facer clic AQUÍ

RENFE e Arriva: servizos especiais

Un ano máis o transporte público pónse ao servizo do Festival Ortigueira incrementando as súas liñas. No caso de Arriva Noroeste activa vaixes especiais dende Ferrol, A Coruña, Santiago, Lugo, Santiago, Viveiro e Ourense. No caso de RENFE pón en marcha trens diarios dende Ferrol.

Se queres consultar as liñas especiais de Arriva Noroeste fai clic AQUÍ

Para ver os horarios dos servizos de RENFE para o Festival Ortigueira faino AQUÍ

E para os que andan pendentes do tempo para asistir a Ortigueira…

Fonte: 4gotas.com
Fonte: 4gotas.com

Aínda que non o creades, parece que este ano conseguiremos que non caia ningunha gotiña en Ortigueira. Segundo o portal meteorolóxico 4gotas , o anticiclón que leva varios días sobre Galicia quedarase por aquí neste 15 primeiros días do mes de xullo, aínda que é cedo para confirmar estas prediccións. De todos os xeitos, o que si é certo é que o tempo non é un impedimento para ir a Ortigueira, xa que está demostrado que, con auga ou sen agua, a festa e a boa música sempre está asegurada no Mundo Celta.

Nada máis, a preparar tendas e mochila, que hai que ir indo para Ortigueira!

Que teñades un bo comezo da mellor semana do ano tod@s! 😉